Ҷамъбасти мусобиқаи варзишӣ оид ба намуди футболи хурд миёни кормандони дастгоҳи марказӣ ва филиалҳои “Амонатбонк”

Санаи 22-юми майи соли равон дар майдончаи варзишии “Амонатбонк” воқеъ дар ноҳияи Синои шаҳри Душанбе бо иштироки муовини Раиси Раёсати Бонк Ризвонзода Ф.З., директори лигаи футзали Тоҷикистон Бахтовар Меликов ва аҳли кормандон ҷамъбасти мусобиқаи варзишӣ оид ба намуди футболи хурд ба муносибати “25 май-Рӯзи ҷаҳонии футбол” доир гардид.

Нахуст дар оғози чорабинӣ муовини Раиси Раёсат Ризвонзода Ф.З. суханронӣ намуда, қайд карданд, ки санаи 9 феврали соли 2024 аз ҷониби Президенти Ассотсиатсияи футболи Осиёи Марказӣ, Президенти Федератсияи футболи Тоҷикистон муҳтарам Рустами Эмомалӣ бори нахуст ба Созмони Милали Муттаҳид пешниҳод гардид, ки нақши футбол дар сатҳи ҷаҳонӣ пазируфта шуда, бо қабули қатъномаи махсуси Ассамблеяи генералии СММ расман Рӯзи ҷаҳонии футбол эълон карда шавад. Хушбахтона, аз тарафи ҷомеаи ҷаҳонӣ ташаббуси Президенти Ассотсиатсияи футболи Осиёи Марказӣ, Президенти Федератсияи футболи Тоҷикистон муҳтарам Рустами Эмомалӣ дар бораи эълон намудани 25 май - Рӯзи ҷаҳонии футбол пазируфта шуд.

Маҳз бо ин шарофат, бори аввал санаи 25 май, дар Ҷумҳурии Тоҷикистон Рӯзи ҷаҳонии футбол дар сатҳи баланд ва бо шукӯҳ таҷлил мегардад.

Қайд гардид, ки ба ин муносибат дар миёни кормандони саридора ва филиалҳои “Амонатбонк” дар шаҳри Душанбе ва ноҳияҳои гирду атрофи он бо иштироки 14 даста мусобиқаи кушоди варзишӣ оид ба футболи хурд ташкил гардида, дастаҳо миёни ҳам рақобат ва аз худ маҳорати баланди варзишӣ нишон дода, беҳтаринҳо ба даври финалӣ роҳ ёфтанд.

Ҳамин тариқ дар даври финалӣ дастаҳо аз Идораи ҳисобдорӣ ва Департаменти пардохти нафақа ва кортҳои бонкии Раёсати Бонк миёни ҳам рақобат намуда дастаи футболбозони Департаменти пардохти нафақа ва кортҳои бонкӣ ба дастаи Идораи ҳисобдорӣ бо ҳисоби 4:3 ғолиб дониста шуда, дастаи Департаменти пардохти нафақа ва кортҳои бонкӣ ғолиби ҷойи якум, дастаи Идораи ҳисобдорӣ ғолиби ҷойи дуюм ва дастаи футболбозон аз филиали №10-и шаҳри Ҳисор ғолиби ҷойи 3-юм дониста шуданд.

Дар анҷом дар вазъияти тантанавӣ ба дастаи футболбозони ғолиб ҷом ва диплом тақдим гардида, ҳамзамон дарвозабонони беҳтарин ва бозингарони беҳтарин низ барои иштироки фаъолона ва саҳмгузорӣ дар тарғибу ташвиқи футбол бо Сипосномаҳои КВД БА ҶТ “Амонатбонк” сарфароз гардонида шуданд.